തിരുവനന്തപുരം: രാഹുൽ മാങ്കൂട്ടത്തിൽ എംഎൽഎയ്‌ക്കെതിരെ പീഡനപരാതി നൽകിയ യുവതിയെ അവഹേളിച്ചെന്ന കേസിൽ കോൺഗ്രസ് നേതാക്കളായ സന്ദീപ് വാര്യർക്കും രജിത പുളിയ്ക്കലിനും മുൻകൂർ ജാമ്യം. തിരുവനന്തപുരം അഡീഷണൽ സെഷൻസ് കോടതിയാണ് ഇരുവർക്കും ജാമ്യം അനുവദിച്ചത്. കർശന ഉപാധികളോടെയാണ് ജാമ്യം അനുവദിച്ചിരിക്കുന്നത്. ഇനി സമാന സ്വഭാവമുള്ള കേസുകളിൽ പ്രതികളാകരുത്, സാക്ഷികളെ സ്വാധീനിക്കരുത്, അന്വേഷണ ഉദ്യോഗസ്ഥർ ആവശ്യപ്പെടുന്ന സമയങ്ങളിൽ ഹാജരാകണം തുടങ്ങിയ നിർദേശങ്ങളാണ് കോടതി മുന്നോട്ടുവച്ചത്.
പരാതിക്കാരിയെ അപമാനിക്കുന്ന തരത്തിലുള്ള ഒരു പോസ്റ്റും സോഷ്യൽ മീഡിയയിൽ പങ്കുവച്ചിട്ടില്ലെന്നും, ഒരു വിവാഹച്ചടങ്ങുമായി ബന്ധപ്പെട്ട ചിത്രം മാത്രമാണ് പ്രസിദ്ധീകരിച്ചതെന്നും കോടതിയിൽ സന്ദീപ് വാര്യർ വ്യക്തമാക്കി. താനൊരു സ്ത്രീയായതിനാൽ പരാതിക്കാരിയെ അവഹേളിക്കുന്ന തരത്തിലുള്ള ഒരു നടപടിയും താൻ സ്വീകരിച്ചിട്ടില്ലെന്നായിരുന്നു രജിത പുളിയ്ക്കൽ തന്റെ വാദത്തിൽ കോടതിയെ അറിയിച്ചത്.
ഇതിനിടെ, രാഹുൽ മാങ്കൂട്ടത്തിൽ എംഎൽഎയുടെ ആദ്യ ബലാത്സംഗക്കേസിൽ അറസ്റ്റിനുള്ള വിലക്ക് ഹൈക്കോടതി നീട്ടി. ജനുവരി ഏഴുവരെ വിലക്ക് തുടരുമെന്നാണ് ഉത്തരവ്. രാഹുലിന്റെ മുൻകൂർ ജാമ്യാപേക്ഷ ഹൈക്കോടതി ഇന്നലെയാണ് പരിഗണിച്ചത്.
